១ដាវីឌក៏មានព្រះបន្ទូលថា នេះគឺជាព្រះវិហារនៃព្រះយេហូវ៉ាដ៏ជាព្រះ ហើយនេះជាអាសនានៃដង្វាយដុតសំរាប់ពួកអ៊ីស្រាអែលហើយ។២ គ្រានោះ ទ្រង់បង្គាប់ ឲ្យប្រមូលពួកសាសន៍ដទៃទាំងអម្បាលម៉ាន ដែលអាស្រ័យនៅក្នុងស្រុកអ៊ីស្រាអែល ហើយចាត់ជាងឲ្យទៅដាប់ថ្ម សំរាប់ស្អាងព្រះវិហារនៃព្រះ ៣ ទ្រង់ក៏រៀបចំដែកយ៉ាងសន្ធឹក ដើម្បីធ្វើដែកគោលសំរាប់សន្លឹក និងក្របទ្វារ ហើយសំរាប់ត្រចៀកទ្វារផង និងលង្ហិនយ៉ាងសន្ធឹក ដែលថ្លឹងមិនបានដែរ ៤ ព្រមទាំងឈើតាត្រៅឥតគណនា ដ្បិតពួកសាសន៍ស៊ីដូន និងពួកអ្នកក្រុងទីរ៉ុសគេនាំឈើតាត្រៅយ៉ាងសន្ធឹក មកថ្វាយដាវីឌ ៥ ហើយទ្រង់មានព្រះបន្ទូលថា សាឡូម៉ូន បុត្រយើង នៅក្មេងខ្ចីពេកណាស់ ហើយព្រះវិហារដែលត្រូវស្អាងថ្វាយព្រះយេហូវ៉ា នោះត្រូវតែបានរុងរឿងយ៉ាងក្រៃលែង ព្រមទាំងមានសិរីលំអ និងល្បីឮទួទៅ នៅគ្រប់ទាំងនគរផង ដូច្នេះ យើងនឹងរៀបចំឲ្យ យ៉ាងនោះដាវីឌក៏ត្រៀមប្រដាប់ទុកជាបរិបូរមុនដែលទ្រង់អស់ព្រះជន្មទៅ។៦ រួចមកទ្រង់ហៅសាឡូម៉ូន ជាព្រះរាជបុត្រា មកផ្តាំឲ្យស្អាងព្រះវិហារ ថ្វាយព្រះយេហូវ៉ា ជាព្រះនៃសាសន៍អ៊ីស្រាអែល ៧ ដាវីឌក៏មានព្រះបន្ទូលនឹងសាឡូម៉ូនថា កូនអើយ ក្នុងចិត្តអញមានគំនិតចង់ស្អាងព្រះវិហារថ្វាយដល់ព្រះនាមព្រះយេហូវ៉ា ជាព្រះនៃអញហើយ ៨ តែព្រះបន្ទូលនៃព្រះយេហូវ៉ាបានមកដល់អញថា ឯងបានកំចាយឈាមជាច្រើន ហើយបានច្បាំងចំបាំងយ៉ាងធំ មិនត្រូវឲ្យឯងស្អាងព្រះវិហារ សំរាប់ឈ្មោះអញទេ ពីព្រោះបានកំចាយឈាមជាច្រើន នៅលើផែនដី នៅចំពោះអញ ៩ មើល នឹងមានកូនប្រុស១កើតដល់ឯង កូននោះនឹងបានជាមនុស្សទំនេរនៅ ហើយអញនឹងឲ្យវាមានសេចក្តីសំរាក ពីពួកខ្មាំងសត្រូវនៅជុំវិញ ដ្បិតវានឹងមានឈ្មោះថា សាឡូម៉ូន ហើយនៅជំនាន់វា អញនឹងឲ្យពួកអ៊ីស្រាអែលបានសេចក្តីសុខសាន្ត និងសេចក្តីស្រាកស្រាន្ត ១០ កូននោះនឹងស្អាងព្រះវិហារ សំរាប់ឈ្មោះអញវិញ វានឹងធ្វើជាកូនរបស់អញ អញក៏នឹងធ្វើជាឪពុកដល់វា ហើយនឹងតាំងរាជ្យវា លើនគរអ៊ីស្រាអែលជាដរាបទៅ ១១ ដូច្នេះ កូនអើយ សូមឲ្យព្រះយេហូវ៉ាគង់ជាមួយនឹងឯង ហើយសូមឲ្យឯងបានចំរើនឡើង ដើម្បីស្អាងព្រះវិហារនៃព្រះយេហូវ៉ា ជាព្រះនៃឯងដូចជាទ្រង់បានមានព្រះបន្ទូលពីដំណើរឯងហើយ ១២ សូមតែឲ្យព្រះយេហូវ៉ា ទ្រង់ប្រទានប្រាជ្ញា និងយោបល់ ដល់ឯង ហើយបង្គាប់បញ្ជាឯងពីដំណើរសាសន៍អ៊ីស្រាអែល ដើម្បីឲ្យឯងបានកាន់តាមក្រឹត្យវិន័យរបស់ព្រះយេហូវ៉ា ជាព្រះនៃឯង
ការយល់ដឹងពីអត្ថបទ
ស្តេចដាវីឌបានកំណត់ទីតាំងនាពេលអនាគតនៃព្រះវិហារបរិសុទ្ធ ហើយប្រគល់តំណែងជាអ្នកដឹកនាំទៅឱ្យបុត្រារបស់ទ្រង់ គឺសាឡូម៉ូន។ ស្ដេចដាវីឌបានគូសបញ្ជាក់ពីព្រះរាជបញ្ជារបស់ព្រះថា សាឡូម៉ូន ដែលជាបុរសនៃសន្តិភាព គួរតែសាងសង់ទីសក្ការៈបូជា ដោយសារប្រវត្តិ សង្គ្រាមរបស់ដាវីឌបានធ្វើឱ្យទ្រង់គ្មានលក្ខណៈសម្បត្តិគ្រប់គ្រាន់ពីកិច្ចការដ៏ពិសិដ្ឋ។
អត្ថបទនេះគូសបញ្ជាក់ថា កិច្ចការរបស់ព្រះត្រូវបានបង្កើតឡើងដោយផ្អែកលើលក្ខខណ្ឌរបស់ព្រះ មិនមែនតាមលក្ខខណ្ឌរបស់មនុស្សទេ។ សូម្បីតែ «មនុស្សដែលធ្វើតាមព្រះហឫទ័យរបស់ព្រះ» ដូចជាស្ដេចដាវីឌក៏អាចត្រូវបានបដិសេធមិនឲ្យធ្វើកិច្ចបម្រើជាក់លាក់ណាមួយដោយសារតែអតីតកាលរបស់គាត់ដែរ។ លើសពីនេះ វាគូសបញ្ជាក់ពីសារៈសំខាន់នៃការបំពេញដោយភ្លើងនៃព្រះវិញ្ញាណ ពីជំនាន់មួយទៅជំនាន់មួយៗ ដោយបំពាក់បំប៉នយុវជនជំនាន់ក្រោយជាមួយនឹងព្រះបន្ទូលជាមូលដ្ឋានគ្រឹះខាងវិញ្ញាណដែលពួកគេត្រូវការដើម្បីសម្រេចភារកិច្ចដែលព្រះបានប្រទានឲ្យពួកគេធ្វើ។
១. តើខគម្ពីរមួយណាដែលព្រះទ្រង់ប្រទានមកខ្ញុំនៅថ្ងៃនេះ?
………………………………………………………………………………………………………………………………………………………………………………….។
២. ហេតុអ្វីបានជាទ្រង់ប្រទានខគម្ពីរនេះមកខ្ញុំដូចច្នេះ? ទូលបង្គំនឹងធ្វើតាមបង្គាប់ទ្រង់។
………………………………………………………………………………………………………………………………………………………………………………….។
៣. ប្រសិនបើកូនបានធ្វើតាមបង្គាប់ទ្រង់ហើយ តើទ្រង់នឹងប្រទានអ្វីដល់ទូលបង្គំ?
………………………………………………………………………………………………………………………………………………………………………………….។
សេចក្តីអធិស្ឋាន
………………………………………………………………………………………………………………………………………………………………………………….។
