ថ្ងៃព្រហស្បតិ៍ ទី០២ ខែតុលា ឆ្នាំ២០២៥ ព្រះយេស៊ូវជាមហាបូជាចារ្យនៃសញ្ញាថ្មី ហេព្រើរ 8:1-13

ការអធិស្ឋាន

ការអានអត្ថបទ

១ រីឯដែលបង្រួមសេចក្តីអធិប្បាយទាំងប៉ុន្មានអម្បាញ់មិញនេះ នោះគឺថា យើងរាល់គ្នាមានសំដេចសង្ឃ១អង្គយ៉ាងនោះ ដែលទ្រង់បានគង់ខាងស្តាំបល្ល័ង្កនៃឫទ្ធានុភាពនៅស្ថានសួគ៌ ២ ជាអ្នកមានការងារក្នុងទីបរិសុទ្ធ ហើយក្នុងរោងឧបោសថដ៏ពិត ដែលព្រះអម្ចាស់បានដំឡើង មិនមែនជាមនុស្សទេ។៣ ឯសំដេចសង្ឃទាំងប៉ុន្មាន នោះបានតាំងឲ្យមានងារ សំរាប់នឹងថ្វាយដង្វាយ ហើយយញ្ញបូជា បានជាត្រូវឲ្យព្រះអង្គនេះបានអ្វីនឹងថ្វាយដែរ ៤ ដ្បិតបើសិនជាទ្រង់គង់នៅផែនដី នោះទ្រង់មិនបានធ្វើជាសង្ឃទេ ពីព្រោះមានពួកសង្ឃដែលថ្វាយដង្វាយ តាមក្រឹត្យវិន័យហើយ ៥ ដែលគេជាគំរូ ហើយជាស្រមោល ពីរបស់នៅស្ថានសួគ៌វិញ ដូចជាព្រះបានបង្គាប់លោកម៉ូសេ ក្នុងកាលដែលលោករៀបនឹងធ្វើរោងឧបោសថថា «ចូរប្រយ័ត្ននឹងធ្វើគ្រប់ទាំងអស់ តាមគំរូដែលអញបានបង្ហាញឯងនៅលើភ្នំ» ៦ តែឥឡូវនេះវិញ ដែលទ្រង់ជាអ្នកកណ្តាលរបស់សេចក្តីសញ្ញា១ដ៏ប្រសើរជាងប៉ុណ្ណា ដែលសេចក្តីសញ្ញានោះបានតាំងឡើង លើពាក្យសន្យាប្រសើរជាងផង នោះទ្រង់ក៏បានទទួលការងារដ៏ប្រសើរជាងប៉ុណ្ណោះដែរ ៧ ដ្បិតបើសិនជាសញ្ញាចាស់ឥតមានកំហុស នោះមិនបានរកកន្លែងឲ្យបានតាំង១ទៀតឡើយ ៨ ពីព្រោះ ដែលទ្រង់ចាប់សេចក្តីកំហុស នោះទ្រង់មានព្រះបន្ទូលទៅគេថា «មើល ព្រះអម្ចាស់មានព្រះបន្ទូលថា នឹងមានថ្ងៃមក ដែលអញនឹងតាំងសញ្ញាថ្មី ដល់វង្សានុវង្សនៃពួកអ៊ីស្រាអែល និងពួកយូដា ៩ មិនមែនតាមសេចក្តីសញ្ញា ដែលអញបានតាំងនឹងពួកឰយុកោគេ នៅថ្ងៃដែលអញបានចាប់ដៃ នាំគេចេញពីស្រុកអេស៊ីព្ទនោះទេ ព្រោះគេមិនបានកាន់ខ្ជាប់តាមសេចក្តីសញ្ញារបស់អញនោះឡើយ ហើយអញបានបែរចេញពីគេដែរ នេះជាព្រះបន្ទូលនៃព្រះអម្ចាស់ ១០ ព្រះអម្ចាស់មានព្រះបន្ទូលថា ឯសេចក្តីសញ្ញា ដែលអញនឹងតាំងដល់វង្សានុវង្សនៃពួកអ៊ីស្រាអែលក្រោយគ្រានោះ គឺថា អញនឹងដាក់ក្រឹត្យវិន័យអញនៅក្នុងគំនិតគេ ហើយនិងកត់ទុកនៅក្នុងចិត្តគេផង អញនឹងធ្វើជាព្រះដល់គេ ហើយគេនឹងធ្វើជារាស្ត្ររបស់អញ ១១ នោះមិនចាំបាច់ឲ្យគ្រប់គ្នាបង្រៀនអ្នកជិតខាងនឹងបងប្អូនខ្លួនថា ចូរស្គាល់ព្រះអម្ចាស់នោះទេ ដ្បិតក្នុងពួកគេ មនុស្សនឹងស្គាល់អញគ្រប់គ្នា តាំងពីអ្នកតូច រហូតដល់អ្នកធំហើយ ១២ ពីព្រោះអញនឹងអាណិតមេត្តាចំពោះសេចក្តីទុច្ចរិតរបស់គេ ហើយអញនឹងលែងនឹកចាំពីអំពើបាប និងសេចក្តីទទឹងច្បាប់របស់គេទៀត» ១៣ រីឯពាក្យដែលថា «ថ្មី» នោះគឺថា ព្រះទ្រង់បានធ្វើឲ្យសេចក្តីមុនទៅជាចាស់ហើយ ឯរបស់ណាដែលត្រឡប់ជាចាស់ ហើយមានវ័យកន្លង នោះក៏ជិតនឹងសូន្យបាត់ដែរ។

តើទ្រង់នឹងប្រទានព្រះបន្ទូលអ្វីដល់ទូលបង្គំនៅថ្ងៃនេះ? ខ្ញុំនឹងទទួល

ហេតុអ្វីបានជាព្រះអង្គប្រទានព្រះបន្ទូលនេះមកខ្ញុំ?

តើខ្ញុំគួរអនុវត្តព្រះបន្ទូលដែលព្រះអង្គប្រទានមកខ្ញុំដោយរបៀបណា?

ការយល់ដឹងអំពីអត្ថបទ

ព្រះយេស៊ូវ​ជា​មហា​បូជាចារ្យ​នៃ​សញ្ញា​ថ្មី ពួកសង្ឃលេវីបានថ្វាយសាច់សត្វជាតង្វាយយញ្ញបូជា ប៉ុន្ដែព្រះគ្រីស្ទបានថ្វាយរូបអង្គទ្រង់ផ្ទាល់។ព្រះអង្គមិនបានធ្វើដូចពួកសង្ឃលេវីនោះទេ ប៉ុន្ដែកិច្ចការរបស់ពួកសង្ឃលេវីឆ្លុះបញ្ជាំងពីកិច្ចការរបស់ព្រះអង្គនៅក្នុងអនាគត។ការថ្វាយដង្វាយរបស់ពួកសង្ឃគឺជារូបភាពតំណាងនៃការថ្វាយរូបអង្គព្រះគ្រីស្ទផ្ទាល់។ ភាពជាសង្ឃក្នុងសម័យចាស់បានបរាជ័យរួមនឹងសម្ព័ន្ធមេត្រីចាស់ដែរ។ ហេតុនេះហើយត្រូវតែមានភាពជាសង្ឃថ្មី និងខ្ពង់ខ្ពស់សម្រាប់សម្ព័ន្ធមេត្រីថ្មី និងអស្ចារ្យដែរ ឯភាពជាសង្ឃថ្មីនោះគឺជារបស់ព្រះគ្រីស្ទនោះឯង។ ព្រះគ្មានបំណងព្រះទ័យទុកសេចក្ដីសញ្ញាចាស់(សម្ព័ន្ធមេត្រីចាស់)អោយនៅគង់វង្សរហូតនោះទេ។ ព្រះប្រទានសេចក្ដីសញ្ញាមកជាប្រយោជន៍ដល់ពួកអ៊ីស្រាអែល ប៉ុន្ដែវាបានបរាជ័យក្នុងការបង្កើតអោយមានព្រះពរតាមព្រះបន្ទូលសន្យា ព្រោះមនុស្សមិនអាចនឹងគោរពតាមបញ្ញត្ដិទាំងនោះបានទេ។សេចក្ដីសញ្ញាថ្មីមិនអាចបរាជ័យបានទេ ព្រោះវាមិនអាស្រ័យទៅលើការគោរពរបស់មនុស្សចំពោះក្រឹត្យវិន័យឡើយ វាអាស្រ័យលើព្រះគុណនៃព្រះជាម្ចាស់ នៅក្នុងការផ្លាស់ប្ដូរចិត្ដរបស់មនុស្សវិញ។មនុស្សមិនត្រូវការពួកសង្ឃដើម្បីភ្ជាប់ទំនាក់ទំនងជាព្រះជាម្ចាស់នោះទេ។ពេលនេះពួកគេមានទំនាក់ទំនងផ្ទាល់ជាមួយនឹងព្រះ

សួរព្រះម្តងទៀត

ការអធិស្ឋាន