ការអធិស្ឋាន
ការអានអត្ថបទ
១ រីឯពួកបណ្តាជន ជាសាសន៍អ៊ីស្រាអែល គេបានស្បថនៅត្រង់មីសប៉ាថា មិនត្រូវឲ្យមានអ្នកណាមួយក្នុងពួកយើងរាល់គ្នា ឲ្យកូនស្រីរបស់ខ្លួនទៅធ្វើជាប្រពន្ធពួកបេនយ៉ាមីនឡើង ២ គេក៏មកដល់បេត-អែល អង្គុយនៅទីនោះចំពោះព្រះ ដរាបដល់ល្ងាច ព្រមទាំងបន្លឺសំឡេងយំជាខ្លាំងថា ៣ ឱព្រះយេហូវ៉ាជាព្រះនៃសាសន៍អ៊ីស្រាអែលអើយ ហេតុអ្វីបានជាសេចក្តីនេះកើតមកក្នុងសាសន៍អ៊ីស្រាអែល ឲ្យត្រូវបាត់ពូជអំបូរ១ក្នុងសាសន៍យើងខ្ញុំនៅថ្ងៃនេះដូច្នេះ ៤ ដល់ថ្ងៃស្អែកគេក៏ក្រោកឡើងពីព្រលឹម គេស្អាងអាសនា១នៅទីនោះ រួចថ្វាយដង្វាយដុត និងដង្វាយមេត្រី ៥ នោះគេសួរគ្នាថា ក្នុងពូជអំបូរសាសន៍អ៊ីស្រាអែលទាំងប៉ុន្មាន តើអ្នកណាខ្លះដែលមិនបានឡើងមកប្រជុំឯព្រះយេហូវ៉ា គេសួរដូច្នោះពីព្រោះបានស្បថយ៉ាងធ្ងន់ ពីដំណើរអ្នកណាដែលមិនឡើងមកឯព្រះយេហូវ៉ា ត្រង់មីសប៉ានោះថា អ្នកនោះនឹងត្រូវស្លាប់ជាពិតប្រាកដ ៦ ហើយពួកកូនចៅអ៊ីស្រាអែល ក៏នឹកស្តាយពួកបេនយ៉ាមីន ជាបងប្អូនគេ ដោយពាក្យថា នៅថ្ងៃនេះ ពូជអំបូរមួយបានកាត់ចេញពីសាសន៍អ៊ីស្រាអែលហើយ ៧ ធ្វើដូចម្តេចឲ្យយើងរកប្រពន្ធឲ្យពួកគេ ដែលនៅសល់បាន ដ្បិតយើងបានស្បថនឹងព្រះយេហូវ៉ាថា យើងមិនឲ្យកូនស្រីរបស់យើងទៅធ្វើជាប្រពន្ធគេឡើយ។
៨ ដូច្នេះ គេសួរថា ក្នុងពូជអំបូរអ៊ីស្រាអែលទាំងប៉ុន្មាន តើមានពួកណាមិនបានឡើងមកឯព្រះយេហូវ៉ា ត្រង់មីសប៉ា នោះឃើញថា គ្មានអ្នកណាបានឡើងមកពីយ៉ាបេស-កាឡាត ដើម្បីនឹងប្រជុំក្នុងពួកជំនុំទេ ៩ ដ្បិតកាលគេបានរាប់បណ្តាជនទៅ នោះមិនឃើញអ្នកណាពីពួកយ៉ាបេស-កាឡាតណាមួយបាននៅទីនោះសោះ ១០ ដូច្នេះពួកជំនុំក៏ចាត់មនុស្ស១ម៉ឺន២ពាន់នាក់ ក្នុងពួកក្លាហាន ឲ្យទៅឯណោះ ដោយបង្គាប់ថា ចូរទៅសំឡាប់ពួកអ្នកនៅយ៉ាបេស-កាឡាតនោះ ដោយមុខដាវទៅ ព្រមទាំងស្រីៗ និងពួកក្មេងផង ១១ ត្រូវឲ្យអ្នករាល់គ្នាធ្វើដូច្នេះ គឺត្រូវសំឡាប់ពួកប្រុសៗទាំងអស់ទៅ ព្រមទាំងពួកស្រីៗដែលបានស្គាល់ប្រុសហើយផង ១២ ក្នុងពួកអ្នកនៅយ៉ាបេស-កាឡាត នោះឃើញមានស្រីក្រមុំ៤០០នាក់ ដែលមិនទាន់បានស្គាល់ប្រុសណា ដោយរួមដំណេកជាមួយនៅឡើយ គេក៏នាំស្រីទាំងនោះ មកឯទីដំឡើងត្រសាល នៅត្រង់ស៊ីឡូរ ដែលនៅក្នុងស្រុកកាណាន។
១៣ នោះពួកជំនុំទាំងអស់គ្នា ក៏ចាត់គេឲ្យទៅនិយាយនឹងពួកកូនចៅបេនយ៉ាមីន ដែលនៅថ្មដារីម៉ូននោះ ដោយប្រកាសជាសេចក្តីមេត្រីនឹងគ្នាទៅវិញទៅមក ១៤ ដូច្នេះពួកបេនយ៉ាមីនក៏វិលត្រឡប់មកវិញនៅគ្រានោះ រួចពួកជំនុំប្រគល់ស្ត្រីទាំងប៉ុន្មាន ដែលបានទុកឲ្យរស់នៅ ក្នុងពួកស្ត្រីយ៉ាបេស-កាឡាតនោះ ឲ្យដល់គេ តែមិនទាន់បានល្មមឲ្យគេនៅឡើយ ១៥ ពួកបណ្តាជនក៏នឹកស្តាយដល់ពួកបេនយ៉ាមីន ដោយព្រះយេហូវ៉ាបានធ្វើឲ្យបាត់ពួក១ក្នុងពូជអំបូរសាសន៍អ៊ីស្រាអែលទាំងប៉ុន្មានចេញ។
តើទ្រង់នឹងប្រទានពាក្យអ្វីដល់ទូលបង្គំនៅថ្ងៃនេះ? ខ្ញុំនឹងទទួល
ហេតុអ្វីបានជាព្រះអង្គប្រទានពាក្យនេះមកខ្ញុំ?
តើខ្ញុំគួររស់នៅជាមួយពាក្យទាំងនេះដោយរបៀបណា?
ការយល់ដឹងអំពីអត្ថបទ
ការកកើតឡើងវិញនៃកុលសម្ព័ន្ធបេនយ៉ាមីន
ទោះបីជាសង្គ្រាមត្រូវបានបញ្ចប់ហើយក៍ដោយតែពួកអ៊ីស្រាអែលទាំងអស់ត្រូវតែគិតគូររឿងពូជអំបូរបេនយ៉ាមីនដែលសេសសល់ប្រហែល៦០០០នាក់កំពុងលាក់ខ្លួននៅជ្រកថ្មដារីម៉ូន។ពួកអ៊ីស្រាអែលបានស្បត់និងព្រះជាម្ចាស់ហើយបានណែនាំមិនអោយកូនចៅពួកគេយក ឬរៀបការជាមួយកូនចៅនៃពូជអំបូរបេនយ៉ាមីនទេ ដូច្នេះតើពូជអំបូរបេនយ៉ាមីនត្រូវបាត់ចេញពីក្នុងចំណោមពូជអំបូរទាំង១២នៃសាសន៍អ៊ីស្រាអែលឬក៍ជាយ៉ាងណា។តែដំណោះស្រាយនេះត្រូវបានស្រាយគឺនៅពេលពួកអ៊ីស្រាអែលបានស្បត់និងព្រះយេហូវ៉ា វេលានោះពួកក្រុងយ៉ាបេស កាឡាត់មិនបានមកចូលរួមឡើយ ហេតុដូច្នេះកូនស្រីក្រមុំរបស់ពួកគេត្រូវមករៀបការជាមួយកូនកំលោះនៃពូជអំបូរបេនយ៉ាមីនដើម្បីបន្ដពូជពង្សនិងមករួមរស់ជាមួយពូជអំបូរទាំង១២ឡើងវិញ។ -ទោះបីជាពួកគេបានធ្វើសង្គ្រាម ច្បាំងគ្នាទៅវិញទៅមកក៍ពិតមែនតែអ៊ីស្រាអែលមិនបានភ្លេចពីភាពជាបងប្អូននឹងគ្នាជាមួយបេនយ៉ាមីនឡើយ។ចុងក្រោយពួកគេនៅតែអាណិតអាសូរពូជអំបូរបេនយ៉ាមីន ហើយក៍យល់ព្រមអោយពូជបេនយ៉ាមីននេះមកចូលរួមចំណែកក្នុងពូជអំបូរដទៃទៀតដូចមុនដដែល។
សួរព្រះម្តងទៀត
ការអធិស្ឋាន
សញ្ជឹងគិតអំពីព្រះបន្ទូលដែលព្រះបានប្រទានឱ្យអ្នកនៅថ្ងៃនេះ។
