១២ ហេតុនោះ ព្រះបន្ទូលក៏មកពីព្រះយេហូវ៉ា ដល់យេរេមាថា ១៣ ព្រះយេហូវ៉ា ជាព្រះនៃសាសន៍អ៊ីស្រាអែលទ្រង់មានព្រះបន្ទូលដូច្នេះ អញបានតាំងសេចក្តីសញ្ញានឹងពួកព្ធយុកោឯងរាល់គ្នា នៅថ្ងៃដែលអញបាននាំគេចេញពីស្រុកអេស៊ីព្ទ ឲ្យរួចពីសណ្ឋានជាបាវបំរើ ដោយពាក្យថា ១៤ លុះផុត៧ឆ្នាំហើយ នោះឯងរាល់គ្នាត្រូវលែងបងប្អូនឯង ជាសាសន៍ហេព្រើរដែលបានលក់ខ្លួនដល់ឯង ហើយបានបំរើឯងអស់៦ឆ្នាំ គឺឯងត្រូវលែងគេឲ្យរួចចេញពីឯងទៅ។ ប៉ុន្តែពួកព្ធយុកោឯងរាល់គ្នាមិនបានស្តាប់តាមអញទេ ក៏មិនបានផ្ទៀងត្រចៀកផង ១៥ ឯឯងរាល់គ្នាទើបនឹងវិលមកធ្វើការ ដែលត្រឹមត្រូវនៅភ្នែកអញ ដោយប្រកាសប្រាប់សេចក្តីប្រោសលោះ ដល់អ្នកជិតខាងឯងរៀងខ្លួនអំបាញ់មិញ ហើយបានតាំងសញ្ញានៅមុខអញ ក្នុងព្រះវិហារដែលហៅតាមឈ្មោះអញផង ១៦ តែឥឡូវនេះ បានបែរទៅជាបង្អាប់ដល់ឈ្មោះអញវិញ ដោយបានបង្ខំឲ្យពួកបាវប្រុសបាវស្រីរបស់ឯងរៀងខ្លួន ដែលឯងបានលែងឲ្យរួចចេញតាមបំណងចិត្តគេនោះ ឲ្យវិលមកនៅក្នុងបង្គាប់ខ្លួន និងធ្វើជាបាវប្រុសបាវស្រីរបស់ឯងរាល់គ្នាវិញទៀត។១៧ ហេតុនោះ ព្រះយេហូវ៉ាទ្រង់មានព្រះបន្ទូលដូច្នេះថា ឯងរាល់គ្នាមិនបានស្តាប់តាមអញ ដើម្បីនឹងប្រកាសប្រាប់ពីសេចក្តីប្រោសលោះ ដល់បងប្អូនឯងរៀងខ្លួន និងដល់អ្នកជិតខាងឯងរៀងខ្លួនទេ ដូច្នេះព្រះយេហូវ៉ាទ្រង់មានព្រះបន្ទូលថា មើល អញប្រកាសប្រាប់ពីសេចក្តីប្រោសលោះដល់ឯងរាល់គ្នាវិញ គឺឲ្យរួចចេញទៅដល់ដាវ ដល់អាសន្នរោគ ហើយដល់អំណត់អត់ដែរ អញនឹងធ្វើឲ្យឯងរាល់គ្នាត្រូវសាត់អណ្តែតទៅមក កណ្តាលអស់ទាំងនគរនៅផែនដី ១៨ ហើយអញនឹងប្រគល់ពួកមនុស្ស ដែលបានក្បត់នឹងសេចក្តីសញ្ញារបស់អញ ជាពួកអ្នកដែលមិនបានធ្វើតាមពាក្យនៃសេចក្តីសញ្ញា ដែលគេបានតាំងនៅមុខអញ ក្នុងកាលដែលគេបានពុះកូនគោជា២ចំហៀង រួចដើរនៅកណ្តាលចំហៀងទាំង២នោះ ១៩ ជាពួកចៅហ្វាយនៃស្រុកយូដា ពួកចៅហ្វាយនៃក្រុងយេរូសាឡិម ពួកសេនាបតី ពួកសង្ឃ និងពួកជនទាំងឡាយនៅក្នុងស្រុកដែលបានដើរកណ្តាលចំហៀងនៃកូនគោនោះ ២០ គឺអញនឹងប្រគល់គេទៅក្នុងកណ្តាប់ដៃនៃពួកខ្មាំងសត្រូវរបស់គេ ហើយក្នុងកណ្តាប់ដៃនៃពួកអ្នក ដែលរកជីវិតគេ ឯសាកសពរបស់គេនឹងជាចំណី ដល់សត្វហើរលើអាកាស និងសត្វជើង៤នៅផែនដី ២១ ហើយអញនឹងប្រគល់សេដេគាជាស្តេចយូដា និងពួកចៅហ្វាយ ទៅក្នុងកណ្តាប់ដៃនៃពួកខ្មាំងសត្រូវ ហើយក្នុងកណ្តាប់ដៃនៃពួកអ្នក ដែលរកជីវិតគេ និងក្នុងកណ្តាប់ដៃនៃពួកទ័ពរបស់ស្តេចបាប៊ីឡូនដែលទើបនឹងថយចេញពីឯងរាល់គ្នានោះ ២២ ព្រះយេហូវ៉ាទ្រង់មានព្រះបន្ទូលថា មើល អញនឹងបង្គាប់ ហើយនឹងធ្វើឲ្យគេវិលមកឯទីក្រុងនេះវិញ នោះគេនឹងច្បាំងចាប់យកទីក្រុងនេះបាន រួចដុតនឹងភ្លើងចោល អញនឹងធ្វើឲ្យទីក្រុងទាំងប៉ុន្មាននៃស្រុកយូដាត្រូវខូចបង់ ឥតមានអ្នកណានៅ។
ការយល់ដឹងពីអត្ថបទ
ព្រះបានប្រកាសការជំនុំជម្រះលើពួកម្ចាស់ទាសករ តាមរយៈលោកយេរេមា។ ព្រះអង្គសព្វព្រះទ័យចំពោះការដែលគេដោះលែងទាសករ ព្រោះនេះបានបង្ហាញពីការគោរពច្បាប់ ដែលព្រះជាម្ចាស់បានប្រទានអោយពួកគេអនុវត្ដន៍តាំងពីជំនាន់លោកម៉ូសេ(និក្ខ២១:២/ចោទិ១៥:១២-១៤)។ ប៉ុន្ដែពួកគេបានចាប់យកទាសករនោះមកវិញបន្ទាប់ពីដោះលែងរួចហើយ នេះជាការប្រឆាំងនឹងព្រះជាម្ចាស់ និងបញ្ញតិទ្រង់។ក្រៅពីមិនគោរពច្បាប់បញ្ញតិរបស់ព្រះពួកម្ចាស់ទាសករ ថែមទាំងបានក្បត់នឹងពាក្យសន្យារបស់ខ្លួនទៀត។ ហេតុនេះហើយព្រះនឹងដាក់ទណ្ឌកម្មដល់ពួកគេ ទៅតាមពាក្យសម្បថដែលពួកគេបានស្បថ ក្នុងពេលធ្វើសម្ព័ន្ធមេត្រី។(នៅសម័យបុរាណ ភាគីដែលរួមក្នុងសម្បថ នាំគ្នាដើរទៅតាមចន្លោះសត្វដែលគេសម្លាប់ហើយស្បថថា នឹងទទួលយកវាសនាដូចជាសត្វនោះអីចឹង បើគេក្បត់នឹងពាក្យសម្បថ)។ ក្នុងករណីរបស់ពួកម្ចាស់ទាសករគឺមានន័យថា ពួកគេនឹងត្រូវគេសម្លាប់ដូចសត្វនោះដែរ។ព្រះជាម្ចាស់នឹងនាំពួកបាប៊ីឡូនមកលុកលុយក្រុងយេរូសាឡិមជាគ្រាចុងក្រោយ។
១. តើខគម្ពីរមួយណាដែលទ្រង់ប្រទានមកខ្ញុំនីថ្ងៃនេះ?
……………………………………………………………………………………………………………………………………………….។
២. ហេតុអ្វីបានជាទ្រង់ប្រទានខគម្ពីរនេះមកខ្ញុំដូចច្នេះ? ទូលបង្គំនឹងទទួលធ្វើតាមបង្គាប់ទ្រង់។
……………………………………………………………………………………………………………………………………………….។
៣. ប្រសិនបើកូនបានធ្វើតាមបង្គាប់ទ្រង់ហើយ តើទ្រង់នឹងប្រទានអ្វីមកដល់កូន?
……………………………………………………………………………………………………………………………………………….។
សេចក្តីអធិស្ឋាន
……………………………………………………………………………………………………………………………………………….។
